Siman pasá, Dutch Caribbean Nature Alliance a organisá un tayer di restorashon di seapel (Diadema Antillarum) na Saba. E tayer akí tabata bou di guia di Hogeschool Van Hall Larenstein (VHL). Durante e tayer ekspertonan i representantenan di e área di Karibe Hulandes i Jamaica a bini huntu pa uni forsa pa restorashon di ref di koral. E tayer akí a yuda 21 eksperto di koral di e region di Karibe i mas ku 65 partisipante ‘online’, pa haña bista amplio di e situashon general di e seapel Diadema den Karibe, inkluso e kasonan aktual di murimentu i di téknikanan di restorashon. Diskushonnan importante a tuma lugá pa determiná e siguiente pasonan nesesario pa moderá e pèrdida di seapel Diadema na nivel regional.
Restorashon di Ref di Koral
Métodonan di restorashon di ref di koral ta dunando resultadonan prometedor pa sosten di esfuersonan regional pa restorá refnan di koral na Karibe Hulandes. Restorashon di ref di koral na Karibe Hulandes a enfoká grandemente riba koralnan. E tayer akí tabata basá riba investigashon i inovashon ku ta introdusí restorashon di e komedó importante di alga: Seapel ku spiña largu (nòmber sientífiko Diadema antillarum).
Foto: Stella Grau
Seapel Diadema
Sea Diadema tin un papel importante den mantenshon di ref di koral saludabel, ku ta esensial pa protekshon di kosta i ta un fuente di entrada krusial pa hende na Karibe Hulandes komo ku ta forma un magnet pa turismo. Seapel Diadema ta yuda mantené e balansa delikado denter di e ref dor di kome alga, ku ta un kompetidor importante di koral. Medio di añanan 1980 un malesa a skeiru rònt di region di Karibe, kabando ku kasi hinter e populashon di seapel. Medio febrüari 2022, tin reportahenan a kuminsá drenta tokante kasonan ekstensivo di murimentu di seapel den region di Karibe. Dor di restorashon di Diadema den área di koral i solushonando menasanan lokal manera kasonan di awa di kloaka, koralnan lo tin mas chèns di sobrebibí.
Foto: Stella Grau
Resultadonan di e Tayer
Den e proyekto di RAAK Pro Diadema project, VHL ta traha estrechamente ku otro institutonan di investigashon i partnernan lokal pa restorá e populashonnan di seapel spiña largu riba e refnan di koral rònt di Saba i Statia. E proyekto akí ta dunando resultadonan prometedor. E lidernan di investigashon Alwin Hylkema i Tom Wijers a kompartí nan hèrmèntnan i téknikonan impreshonante i e e deskubrimentunan mas resien pa fasilitá restorashon di Diadema den e region di Karibe Amplio durante e tayer di DCNA.
A diskutí diferente tópiko, inkluso e status redusí di seapel Diadema, kasonan di murimentu resien di Diadema i téknikanan di restorashon di Diadema. E partisipantenan a risibí tambe seshonnan di training den práktika relashoná ku restorashon di Diadema. Ademas di e 21 partisipantenan presente na Saba, mas ku 65 persona a sigui e presentashonnan habrí ‘online’.
Proyekto di Múltiple Isla
Durante e tayer, tabatin diálogo intenso entre e islanan Karibense. A establesé lasonan di koperashon importante i a identifiká burakunan di kapasidat pa kua mester buska solushon pa restorá e seapel Diadema den Karibe Hulandes. VHL, DCNA i e organisashonnan presente ta investigando e posibilidat pa krea un proyekto di múltiple isla di restorashon di seapel Diadema pa realisá un meta komun: Restorashon di un di e ekosistemanan marino mas importante i deteriorá, e refnan di koral.
E tayer akí a haña sosten generoso di parti di Ministerio di Agrikultura, Naturalesa i Kalidat di Kuminda (LNV) di Hulanda komo un sosten di e Plan di Maneho pa Naturalesa i Medio Ambiente pa e islanan BES, Postcode Loterij Nederland i SIA, un parti di Nederlands Wetenschappelijk Onderzoek (NWO).
Keda bon na altura
Si bo ke haña sa mas tokante e tayer di Diadema i di DCNA su aktividatnan, sigui informashon di DCNA pa medio di nan boletin di notisia digital grátis BioNews (https://dcnanature.org/news/), Facebook (Dutch Caribbean Nature Alliance) òf Instagram (DCNAnature). Pa mas informashon tokante e proyekto RAAK PRO Diadema bishitá https://www.facebook.com/reefrestorationVHL/ òf tuma kontakto ku lider di proyekto alwin.hylkema@hvhl.nl.
Pa mas informashon tokante e tayer di Diadema, por fabor tuma kontakto ku:
Tineke van Bussel, Research Communications Liason na research@dcnanature.org i
Dahlia Hassell – Knijff, Projects Officer na projects@dcnanature.org
Presentations:
