Tribon den Karibe hañá ku nivel peligrosamente haltu di metal pisá

Den un estudio nobo, investigadónan di e instituto non-profit pa investigashon “Beneath the Waves (BTW)” (Bou di Ola) a dokumentá i a desvelá nivelnan alarmantemente haltu di 12 metal pisá, inkluso kuek, den tehido di múskulo di muestranan di tribon grandi di tribon di ref i di tintorero ku a kaputá den área di Bahamas. Publiká awe den Scientific Reports, e datonan nobo ta impliká informashon importante pa salú di hende den e region di Gran Karibe, kaminda hende ta kome tribon de bes en kuando.

Den kurso di e último siglo, aktividatnan di hende a kousa aselerashon rápido di fluho di entrada di metalnan i semi metalnan den e medio ambiente marino, kreando riesgonan potensial pa biodiversidat i siguridat di kuminda. E investigashon ta basa riba estudio di tehido for di múskulo di 36 diferente tribon di seis espesie di tribon. E resultadonan di e estudio akí ta presentá e promé prueba di konsentrashon di metal den kurpa di tribon for di muestra ku a tuma na Bahamas, ku ta un ekosistema relativamente limpi kaminda tribon ta biba liber di peliger den un área marino bou di protekshon. Na Bahamas hende generalmente no ta kome tribon.

Komo tòp komedó di otro bestia, tribonnan biológikamente ta akumulá materia tóksiko den nan kurpa dor di kome esaki den nan komementu di otro piská. Miéntras ku e impakto riba salú di tribon mes ta keda deskonosí, e konsentrashon di metalnan ku e estudio aktual a midi ta alarmante komo ku nan ta surpasá e nivelnan ku ta konsiderá komo tóksiko pa hende por konsumí. E estudio a saka afó tambe ku tribon di ref, ku ta e espesie ku ta mas residente (ku su sede einan), tabatin nivelnan mas haltu di kuek ku e tribonnan tintorero, i ku e nivel di kuek serka tribon di ref tabata oumentá segun nan ta mas adulto i a krese bira mas grandi.

“Komprendementu di e manera kon hende ta afektá e bida di tribon ta importante pa e intentonan di konservashon di e espesienan akí, ku ta ekológikamente i ekonómikamente importante”, Dr. Oliver Shipley ta splika. E ta e outor na kabes di e estudio akí, i ta e persona ku ta planifiká i ehekutá e estudio i ta tambe un investigadó post doktoral na “Beneath the Waves” i na e Universidat di New Mexico. “Hasiendo investigashon den áreanan manera Bahamas kaminda abundansia di tribon ta relativamente stabil i saludabel komo efekto di protekshon pa tempu largu, ta un aspekto importante pa nos por a realisá e investigashonnan básiko akí. Si e nivelnan ta haltu na Bahamas, bo por imaginá bo kon nan lo por ta, na otro partinan di mundu kaminda durabilidat i konservashon di medio ambiente no ta un prioridat.”

“E estudio akí ta suprayá e benefisionan di e santuario di tribon na Bahamas pa realisá estudionan básiko importante tokante salubridat di nos rekursonan marino,” Eric Carey ta menshoná, kende ta Direktor Ehekutivo di Bahamas National Trust. “Esaki ta enfatisá tambe e nesesidat pa intentonan di konservashon duradero regionalmente, ku ta importante pa e ekonomia i salubridat di ref di Bahamas” el a agregá.

Miéntras investigadónan ta studiando e nesesidat pa mas estudio pa por komprendé e rutanan ku ta kondusí finalmente na e manera ku e metalnan akí finalmente ta drenta e ret di kuminda marino, e riesgonan pa salubridat humano ku indigestion di metalnan pisá ora ta kome espesienan di tribon karibense a bira kla.

“Piskamentu di tribon no ta bini hopi dilanti den e region di Gran Karibe, pero konsumo di tribon por ta importante kulturalmente pa algun nashon karibense,” e ko-outor Dr. Austin Gallagher ta menshoná. E ta Hefe Sientífiko na “Beneath the Waves” i ko-fundador di “The Caribbean Shark Coalition”. “Pero ku e demanda fuerte pa produkto di tribon mundialmente, esaki ta un otro pida prueba pa kita hende di konsumí tribon,” e ta agregá.

“Hende i oséano ta mará detayadamente i di forma kompliká na otro, anto e estudio akí ta enfatisá e noshon ku siensia por i mester guia desishonnan ku por drecha salubridat di oséano i di hende.”

# # #

Pa por baha i habri entrada na un PDF fail di e rapòrt kompleto di investigshon, por fabor bishitá: www.nature.com/articles/s41598-020-79973-w

“Shipley ON, Lee CS, Fisher NS, Sternlicht JK, Kattan S, Staaterman ER, Hammerschlag N, Gallagher AJ (2021) Metal concentrations in coastal sharks from The Bahamas with a focus on the Caribbean Reef shark. Scientific Reports”

Tokante “Beneath the Waves

Fundá na 2013, “Beneath the Waves” ta un NGO di oséano ku ta hasi uso di siensia moderno pa progresá den deskubrimentu sientífiko i aktua komo katalisadó di maneho di oséano, ku foko riba espesienan ku ta bou di menasa i áreanan marino protehá.

www.beneaththewaves.org

 

 

 

Would you like to contribute to BioNews
by sharing your news item?

Contact DCNA

Enjoying (Bio)News?

Stay up to date with our monthly digital newsletter which covers all the latest environmental news coming from the Dutch Caribbean.

Enter your email below to sign up!

Or follow us on Facebook