Investigashon di Tribon planeá pa ehekutá un siman largu den awanan di St. Maarten

Saba / Sint Eustatius / Sint Maarten

Durante e siman di 11 di aprel 2021, miembronan di Nature Foundation St. Maarten, Dutch Caribbean Nature Alliance (DCNA), Saba Conservation Foundation (SCF), i Beneath the Waves lo ehekutá un investigashon di tribon den e awanan di St. Maarten. E investigashon akí ta forma parti di un investigashon amplio di Tribon Tintorero den region i ta haña su fondo di parti di WWF-NL pa medio di e Fondonan di Biodiversidat i Nationale Postcode Loterij di Hulanda. Meta di e proyekto di un siman largu ta pa kolektá dato di tribon na St. Maarten i pa e partisipantenan siña traha ku teknologia di ultrasonografia pa despues bai determiná si Saba Bank ta un área di kuna pa tribon tintorero den Ost Karibe. E proyekto di un siman largu lo karga e nòmber di ‘Shark Shakedown’.

© Peter de Maagt

Tribon tintorero (“Galeocerdo cuvier”) ta un yagdó grandi na tòp di e kadena di kuminda ku ta haña rònt mundu riba ref di koral, zona di laman ganchu i atòl oseániko (isla sirkular formá pa koral), inkluso Saba Bank. Un estudio anterior hasí pa Universidat di Wageningen a mustra ku Saba Bank lo por ta un área di kuna importante pa tribon tintorero. Aktualmente Union Internashonal pa Konservashon di Naturalesa tin tribon tintorero registrá bou di e kategoria Serka di Peliger di Ekstinshon. Sin embargo, aktualmente, tin tiki dato tokante e biologia reproduktivo di tribon tintorero.

E teknologia ultrasóniko di kalidat haltu ku e ekipo ta bai hasi uso di dje ta un kreashon di E.I. Medical Imaging i e kolaboradó Dr. James Sulikowski, di Universidat di Estado Arizona kende tabata su pionero. A hasi uso di e teknologia akí den identifikashon di e estado di madures di tribon i di e etapa di embaraso serka diferente espesie di tribon. Lo usa e método akí pa produsí un imágen interno di un tribon loke lo yuda determiná presensia i e estado di reprodukshon di tribon tintorero muhé ku ta presente na Saba Bank, inkluso nan patronchi di moveshon pafó di e fronteranan di Hulanda Karibense. Tribon tintorero ta un espesie ku ta krusa frontera, pues ku ta biaha i ta biba den mas ku un área òf pais.

E informashon ku e investigashon akí lo produsí lo duna mihó komprendementu di e importansia di tantu e nivel di presensia di tribon den awanan teritorial di St. Maarten komo den Yarari Santuario i e papel ku e ekosistemanan akí tin den e siklo di bida di tribon tintorero den e Region Amplio di Karibe.

Ademas, e datonan lo duna informashon vital pa e strategianan di konservashon no solamente den Hulanda Karibense, pero tambe den e área Amplio di Karibe komo totalidat. E ekspedishon di un siman largu pa Saba Bank ta programá pa ougùstùs 2021.

Maske ku tribon tintorero ta aparesé den nos region, nan ta pasa mayoria di nan tempu pafó di kosta den awa hopi hundu i masha tiki ta señalá nan hopi serka kosta. Desafortunadamente a pasa dos insidente den e último lunanan tokante interakshon negativo entre tribon ku hende: unu na St. Martin i e otro na St. Kitts. E proyekto akí di un siman largu na Saba Bank lo investigá tambe si tin kambio den komportashon i distribushon di tribon den nos área. Tribon tintorero tin un papel klave den mantenshon di e balansa den e ekosistemanan marino lokal i regional i nan ta importante pa salubridat di e Biodiversidat Marino di e Region Amplio di Karibe.

Sigui e Shark Shakedown riba Facebook (Dutch Caribbean Nature Alliance), Instagram (dcnanature) òf DCNA su wèpsait(https://dcnanature.org/news/) ku nan boletinnan diario

Pa mas informashon por fabor tuma kontakto ku Dutch Caribbean Nature Alliance via imeil  info@dcnanature.org òf telefòn +599.717.5010

Would you like to contribute to BioNews
by sharing your news item?

Contact DCNA

Enjoying (Bio)News?

Stay up to date with our monthly digital newsletter which covers all the latest environmental news coming from the Dutch Caribbean.

Enter your email below to sign up!

Or follow us on Facebook