Importansia di Yerba di Laman Krioyo den Lucha Kontra Eroshon

Bonaire

A hasi un estudio resien di investigashon pa kalkulá e abilidat di yerba di laman pa minimalisá eroshon den e laman ku poko profundidat den Bahia di Lac, na Boneiru. Mas aleu, e estudio akí a investigá kon komementu intensivo di yerba di laman por tin efekto drástiko riba e abilidat di yerba di laman pa stabilisá sedimento. E estudio akí ta enfoká riba e benefisio di yerba di laman nativo riba espesienan invasivo i e nesesidat di adaptá resultadonan di konservashon di komedónan di yerba di laman (p.e. turtuga) na e habitatnan ku nan ta dependé di dje.

Sabananan di yerba di laman tin un papel importante den medioambiente di awa di poko profundidat. E sabananan akí ta terenonan importante pa buska kuminda i pa krio di yu chikitu pa un variedat di espesie di animal, ta forma filternan natural di awa i ta funshoná komo un bùfer entre zona di riba tera ku refnan di koral i laman habrí. Ademas, sabananan di yerba di laman ta forma tambe un faktor importante den protekshon di e liña di kosta dor ku nan ta apsorbé e energia di olanan, di manera ku nan ta redusí koriente na kosta i nan ta tene sedimento i asina redusí eroshon. Foyonan di yerba di laman ta redusí en general energia (forsa di moveshon) den awa dor ku nan move dilanti i patras kreando un koriente di moveshon dor ku nan ta dobla bai i bini, ta tapa e santu na banda i ta duna protekshon kontra eroshon. Esaki ta partikularmente e kaso pa e yerba di laman nativo di Boneiru, “Thalassia testudinum”, un mata ku foyo diki, ku ta un kuminda faborito pa turtuga kome.

E kamanan di yerba di laman ta bou di un preshon inmenso dor di bahada di kalidat di awa i oumentu di interakshon negativo di hende (manera trapamentu ku pia, tiramentu di anker i kobamentu di fondo). Ademas espesienan invasivo oportuno, manera e yerba di laman “Halophila stipulacea”, a kuminsá ta invadí sabananan di yerba krioyo. E espesie di yerba di laman akí tin foyo mas chikitu, ku ta redusí su kapasidat di kibra energia di awa, banda di e echo ku e tin rais ku brasa lateral (‘rhizome’) mas chikitu ku no ta bai den profundidat di manera ku esaki ta limitá su abilidat pa stabilisá sedimento. E espesie invasivo akí tin ménos kapasidat di resistí orkan grandi, manera orkan Irma di 2017. Despues di e orkan akí, a resultá ku mal tempu a ranka sabananan kompletu di e yerba invasivo “H. stipulacea” bai kuné, te hasta kaminda laman ta hundu, manera ku tabata den bahia di Oranjestad, na Statia, miéntras ku e sabananan bisiña di e yerba “T. Testudinum” pegá ku St. Maarten a sobrebibí e forsa di orkan. Sientífikonan ta kere ku esaki ta bini dor di e raisnan profundo di e yerba di laman nativo i nan abilidat di mara den fondo pa resistí mareo i olanan grandi di orkan fuerte.

Ademas, un kombinashon di bahada di e abundansia di yerba di laman i di bahada di kantidat di animalnan yagdó na tòp di e kadena di yagdó (manera tribon), a kondusí na mas zona di buska kuminda mas intenso ku e mega hèrbivornan (manera turtuga blanku) tin. Investigashon aktual ta mustra ku e mega hèrbivornan tin un preferensia pa yerba di laman nativo riba e sortonan invasivo. Loke ku ta nifiká ku segun e sabananan di yerba di laman krioyo ta sigui bira ménos, nan ta kai tambe bou di preshon mas grandi di parti di e komedónan di yerba di laman.

E estudio

Un intento konhunto entre NIOZ Instituto Hulandes Real pa Investigashon di Laman, Universidat di Utrecht, Universidat di Groningen, Universidat i Investigashon di Wageningen, Unversidat di Radboud Nijmegen i Universidat di Teknologia di Delft a hasi un estudio pa komprendé e servisio di e ekosistema ku e espesienan di yerba di laman nativo i esunnan invasivo ta duna. E investigadónan a harma un eksperimento pa midi direktamente e kapasidat di stabilisá sedimento ku e diferente kamanan di yerba di laman tin. E eksperimento akí a eksplorá e impakto di tantu e espesienan invasivo i e oumento komementu di yerba di parti di e mega herbivornan. E estudio akí a tuma lugá den Bahia di Lac, un bahia ku poko profundidat na e kosta ost di Boneiru. Histórikamente den e bahia akí ta e yerba di laman nativo (“T. Testudinum”) tabata dominá. Sin embargo, un konteo resien a demostrá un oumentu di presensia di e espesie invasivo (“H. stipulacea”) for di momentu ku a señalá esaki promé biaha na 2010. E bahia akí ta un área di kuminda importante pa e poblashon lokal di turtuga.

E Resultadonan

Dor di e eksperimento akí, e investigadónan a logra di demostrá e abilidat di stabilisá sedimento di yerba di laman nativo i e espesie invasivo tin. A resultá ku sabana di yerba di laman kubrí pa e tipo nativo (“T. testudinum”) denso, haltu i ku animalnan no a kome ariba, por a tene i mara efektivamente sedimento di santu den un variashon di diferente kondishon di ola di laman. Ora ku e densidat i e kubrimentu di e klechi di tapa kama tabata ménos, tabatin un bahada general den e abilidat di e yerba di laman pa stabilisá sedimento, dunando asina espasio na oumento di eroshon. A demostrá tambe ku kama di e yerba di laman invasivo “H. stipulacea” ku ta den laman mas profundo ta akumulá sedimento fini durante periodonan di laman kalmu. E sedimento fini akí sinembargo, ta plama bai atrobe ora ku tin ola di laman fuerte, loke ta oumentá e aspekto vulnerabel di e fondo di laman pa eroshon riba término largu.

E estudio akí a demostrá e efektividat di e yerba di laman nativo ku foyo largu pa minimalisá eroshon pa medio di su sistema di rais largu i su abilidat di dobla i protehá e kapa di santu ku ta tin na fondu. Den áreanan ku yerba ta komé i asina ta mas chikitu, e foyonan di yerba no por a ofresé asina tantu protekshon. Por a mira patronchinan di eroshon similar den áreanan sin vegetashon.

E Futuro

Konservashon di turtuga di laman a logra éksito grandi den área di Karibe, e resultadonan akí ta bini dilanti den oumento di e poblashon di turtuga blanku denter di Bahia di Lac. Ta rekirí intentonan di konservashon paralelo di e habitatnan importante akí, espesialmente ora ku tin preshon kresiente riba e sabananan di yerba di laman ku a baha kaba na kalidat. Na momentu di deliñá i implementá proyekto di konservashon, ta importante pa tene kuenta ku tur e nivelnan den e medioambiente. E estudio akí ta demostrá e importansia di sostené e konservashon di e habitatnan huntu ku konservashon di e habitantenan asina gustá.

Reportá e enkuentronan ku tabatin:

Bo a mira turtuga di laman? Yuda nos komprendé mihó e preshon di komementu di nos yerba di laman krioyo dor di reportá bo enkuentronan riba e wèpsait DutchCaribbean.Observation.org òf baha e appnan grátis.

E wèpsait akí i e appnan grátis por keda usá no solamente pa biólogonan pero tambe pa tur siudadano reportá kualke enkuentro ku animal i planta i ta disponibel na mas ku 40 idioma. Ta trahando aktualmente tambe riba un tradukshon na papiamentu. E reportahe di espesienan dor di habitantenan lokal ta hopi balioso pa e organisashonnan di konservashon pa siña i protehá e espesienan riba nos islanan. Pa mas informashon tuma kontakto ku research@dcnanature.org

More info in the Dutch Caribbean Biodiversity Database

James, R.K., Christianen, M.J.A., van Katwijk, M.M., de Smit, J.C., Bakker, E.S., Herman, P.M.J., Bouma, T.J. (2020). Seagrass coastal protection services reduced by invasive species expansion and megaherbivore grazing. Journal of Ecology. DOI: 10.1111/1365-2745.13411

Would you like to contribute to BioNews
by sharing your news item?

Contact DCNA

Enjoying (Bio)News?

Stay up to date with our monthly digital newsletter which covers all the latest environmental news coming from the Dutch Caribbean.

Enter your email below to sign up!

Or follow us on Facebook