Un revishon di e investigashon di 40 aña bieu di e palma “Sabal palm” pa e islanan di Boneiru i Kòrsou a eksponé e diferensianan palpabel entre e dos islanan. Dor di maneho aktivo di Parke, Kòrsou a yega na un oumento di mas ku tres biaha di e kantidat di palma adulto Kabana, miéntras ku e kantidat di palmanan na Boneiru, dor di falta di maneho di e populashon di e palmanan, a eksperensiá un bahada di kasi 20% di palma adulto. Protekshon aktivo di e palma endémiko akí ku tin nan balor, por ta e úniko kaminda pa por sigurá nan futuro.
Sabal palm, òf Kabana manera su nòmber krioyo ta serka hende lokal, ta e úniko espesie di palu di palma nativo ku tin riba e islanan di Boneiru ku Kòrsou. Te hasta ta e kaso, ku tabatin diskushonnan pisá tokante e berdadero identidat di e palma akí, ku su diferente klasifikashonnan kambiando den kurso di añanan te ku finalmente a rekonosé esaki den dos publikashon sientífiko komo dos espesie endémiko “Sabal antillensis” na Kòrsou, na 2017, i na Boneiru komo “Sabal lougheediana”, na 2019.
Riba tur dos isla por haña distribushon di e populashon di Sabal palm den áreanan hopi limitá. Na Kòrsou su distribushon ta limitá na e serunan mas haltu na e parti sùitwèst di Parke Kristòf i áreanan bisiña ei banda. Na Boneiru, ta haña e palma akí solamente den e área di Lima, ku e tèras hopi abou di piedra di kalki situá wèst di Bahia di Lac i nòrt di e saliñanan di salu.
Photo credit: © John de Freitas
Na 1979, e sientífiko J.E. Winkelman a investigá e kantidat di palma na ámbos isla, loke a duna e sifra di 1,062 ehemplar na total. Di esakinan, solamente 354 tabata palma adulto, i di esakinan ta solamente 31 a haña na Boneiru. Den e estudio inisial akí, Winkelman tambe a hasi menshon ku e menasa mas grandi pa e palmanan ku a sobra mui probablemente ta e animalnan ku ta kana buska kuminda na mondi, manera kabritu ku buriku, ku por a kome i trapa mata resien nasé. Despues di e evaluashon inisial akí, no tabatin mas estudio hasí, kreando asina un bashí di konosementu signifikante pa loke ta trata e status
aktual di e palmanan importante akí.
Afortunadamente, un estudio nobo a traha riba eliminashon di e bashí akí. Sientífikonan a dokumentá e populashon aktual riba ámbos isla i a kompará e resultadonan akí ku esunnan di e estudio inisial di 1979. E meta no tabata solamente duna un konteo nobo ku ta aktual, pero tambe pa tuma nota si tin kualke kambio a bini den nan distribushon, ku lo duna komprendementu di e faktornan ku ta kontribuí na diseño di un strategia di konservashon efektivo.
E Estudio
Na 2018, e investigashonnan a tuma lugá pa medio di konteo di e kantidat di palma riba kada isla. Teniendo kuenta ku e áreanan geográfiko i e aspekto úniko di e tereno, en general tabata fásil pa lokalisá i haña e palmanan akí. Dor di hasi uso di téknikonan similar i e mesun sitionan di investigashon, por a kompletá un komparashon direkto entre e estudionan di 1979 ku 2018, pa yuda evaluá si e populashon lokal tabata bahando, stabil òf oumentando.
Interesante ta e echo, ku e populashonnan riba e dos islanan a demonstrá un desaroyo kompletamente diferente den kurso di tempu. Na Kòrsou tabatin un oumento di 318% di palma adulto, miéntras ku na Boneiru tabatin un bahada di mas òf ménos 20%. Apesar di e kambio den kantidat di populashon, tabatin
tambe kambio signifikante den distribushon. Na Kòrsou, en general e distribushon geográfiko di e palmanan akí a oumentá, di ménos ku 5 km2 na 1979 pa 8 km2 na 2018. Atrobe, Boneiru tabatin un patronchi hopi diferente, ku e distribushon geográfiko birando mas chikitu di 5 km2 pa ménos ku 1 km2.
Otro resultado
Riba ámbos isla, tabatin relativamente un kantidat haltu di mata resien nasé den e área di distribushon geográfiko. Na Kòrsou, esaki por ta e resultado di un oumento di mata adulto. Na Boneiru, por buska e motibu mas tantu dor di e temporada di aña ku a hasi e investigashon. E investigashon di 2018 a tuma
lugá nèt despues di e temporada di áwaseru, loke por splika e oumento di kantidat di mata resien nasé, komo ku simia fresku ta spreit saka yu di forma hopi fásil. Kambio den e kantidat general di palma por bini dor di un grupo amplio di faktor. Parke Kristòf a realisá un maneho aktivo di populashon di nan kabritunan i burikunan for di medio di aña 1980. E bahada di kantidat di animal ku ta kana liber rònt pa buska kuminda por a duna e palmanan akí mas chèns di sobrebibí. Ta konosí ku e animalnan akí ku ta kana kome mata, ta kome e palmanan i ta trapa riba e matanan resien nasé redusiendo vegetashon i mata ku ta kubri suela, di manera ku nan ta forma un menasa pa e chèns di e matanan resien nasé di krese ku éksito. E oumento di área di distribushon por ta debí na plamamentu eksitoso di simia dor di e populashon di bestia lokal, komo ku tin vários espesie di para, biná, animal rodente i yuana ku ta biba den e área akí i ku ta kome e simianan akí.
Rekomendashon
E resultadonan di e estudio akí a pone e sientífikonan yega na kuater rekomendashon esensial pa diseñá un strategia eksitoso pa konservá e palmanan akí. Na promé lugá, nan ta rekomendá maneho aktivo di hèrbivor denter di e habitat di e palmanan. Na Boneiru, esaki lo por ta konstrukshon di un kurá di 3.5 km largu ku ta kore na rant di e área di Lima di manera ku ta sera hinter e populashon di e palma Kabana den e área di Lima. Na di dos lugá, nan ta rekomendá implementashon di un plan di monitoreo mas vigoroso pa yuda vigilá salubridat i oumento di populashon di e palmanan akí, pa haña
puntonan di indikashon pa e futuro populashonnan. Na di tres lugá, a hasi rekomendashon pa Boneiru aktivamente kultivá e palmanan akí na otro áreanan di Boneiru, pa trese kambio den e sifranan general di e populashon. Por último, mester kontinuá ku e programa di maneho di Parke Kristòf,
manera e estudio akí a demonstrá e impakto signifikante ku redukshon di e kantidat di animal di mondi ku ta kana kome mata por tin.
Futuro di e interesante Sabal palm (Palma Kabana)
E animalnan ku ta kana liber rònt na Boneiru hopi biaha ta forma parti di e enkanto importante di e isla. Un futuro eksitoso di e espesienan endémiko di e isla, tantu di mata komo animal, mester inkluí un balansa pa por duna kada unu un chèns pa bona, basá riba e kapasidat ekológiko di naturalesa. E
estudio akí ta demonstrá kon maneho aktivo di animal di mondi por drecha populashon di e flora di e isla drástikamente. Komprendementu di e impakto ku kada espesie tin riba e ekosistema, lo yuda organisashonnan di maneho di naturalesa diseñá i implementá plannan di maneho, pa sigurá un futuro saludabel pa e isla.
Pas mas informashon
