DCNA su Promé First Big Live Nature Quiz- edishon pa Adulto

All DC islands

Wega Prèt online tokante Bestianan rònt Karibe Hulandes

Riba djabièrnè 2 di yüli, Dutch Caribbean Nature Alliance (DCNA) a tene su promé Big Live Nature Quiz pa adulto na Aruba, Boneiru, Kòrsou, Saba, Statia, i St. Maarten. Na total 39 tim ku riba 100 miembro di tim formando tim di te 1-4 hungadó a partisipá na e kues ku a bai via internèt i ta interaktivo. Despues di hopi tanda ku preguntanan interesante i inspirante tokante naturalesa, un tim na Boneiru a gana. Di dos lugá a bai pa un tim na Aruba i e di tres lugá a bai pa un otro tim na Boneiru.

E kues di plaser akí ta na ingles pero e preguntanan lo tin tambe nan tradukshon den e suptítulo na hulandes i papiamentu.

A krea e Big Live Nature Quiz ku ta online pa eduká siudadanonan tokante naturalesa riba un manera prèt i interaktivo, pa lanta orguyo pa naturalesa di e isla, enkurashá práktikanan ku ta bon pa medioambiente, sostené e proyektonan di konservashon di e parkenan, i pa trese personanan rònt Hulanda Karibense den kontakto ku otro.

Kuesnan grátis kada aña pa Adulto i Mucha

E meta ta pa hasi e kuesnan un evento anual pa tantu adulto komo mucha. Na 2020, a lansa e promé edishon pa mucha. Pa 2021, e edishon pa mucha aktualmente ta planeá pa kuminsamentu di òktober. Keda pendiente pa bo siguiente oportunidat pa bo siña mas tokante naturalesa di Hulanda Karibense.

Kues Live i Interaktivo

E timnan por a partisipá tambe ku famia i amigunan for di kas na Aruba, Boneiru, Kòrsou, Saba, Statia i St. Maarten

Boneiru: Partisipantenan na DCNA su Big Live Nature Quiz lesando ku atenshon e preguntanan na “Hillside-Bonaire”.

Timnan por a partisipá na dos forma. Sea ku timnan ku a haña invitashon pa hunga for di e base na kas/online huntu amigu i famia òf djòin e kues na un di e sitionan di transmishon.

E ‘Quiz’ tabata online i bibu. Di e forma akí, tur e timnan di e islanan di Karibe Hulandes por a partisipá na mes momentu i tambe por komuniká ku otro i ku e anfitrion di e programa.

Sitionan di transmishon tabata “Hillside” na Boneiru, “Long Haul” na Saba, i “Dinghy Dock Sailors Bar” na St. Maarten. Un danki di kurason ta bai pa e establesimentunan akí i tambe na STINAPA Bonaire, CARMABI na Kòrsou, Aruba National Park Foundation, Saba Conservation Foundation (SCF), STENAPA na St Eustatius i Nature Foundation Sint Maarten (NFSXM) pa nan sosten na e evento akí.

Tema: Animalnan di Karibe Hulandes

E kues Big Live Nature Quiz pa adulto tabata konsistí di 35 pregunta komun den e siguiente kategorianan: Animalnan Marino, Animalnan Terestre, Zonido den Naturalesa, Espesienan Spesial di e islanan, i Hende i Naturalesa. Tabatin un pousa chikitu meimei pa por a tuma algu di bebe i pasaboka pa prepará pa bai di dos ròndu.

Ganadónan

Durante e kues ku tabata Live i Interaktivo e timnan por a sigui desaroyo di nan skor. Despues di sinku tanda di kompetensia, a anunsiá e ganadónan. E promé lugá ku skor di 293 a bai pa “Jonkers” na Boneiru. Nan lo risibí un paseo ku boto di bela ku posibilidat di snòrkel rondó di nan isla bunita. Di dos i di tres lugá a bai pa respektivamente “Mini’s Butlers” (ku 259 punto) na Aruba i “Gwen & Dunc” (ku 254 punto) na Boneiru. Nan lo risibí sombré ku T-shirt di e logo di Big Live Nature Quiz. Pabien na nan tur!

Reakshon di un partisipante di e kues BLNQ na “Long Haul” Saba: “Mi a gusta e kues! Spesialmente mi a gusta e kategoria Zonido den Naturalesa, pasobra esaki tabata diferente di kualke otro kategoria komun ku mi a yega di topa den un kues”.

No pèrdè e siguiente Big Live Nature Quiz

Kontrolá DCNA su Facebook (Dutch Caribbean Nature Alliance), Instagram (DCNAnature) òf BigLiveNatureQuiz.org pa mas informashon i pòrtrèt di e eventonan. Si tin kualke pregunta, manda un mensahe di meil pa info@DCNAnature.org òf yama na +599-717-5010.

Big Live Nature Quiz ta haña fondo generoso di Ministerio di Agrikultura, Naturalesa i Kalidat di Kuminda (LNV) i e aktividatnan di DCNA ta haña sosten di ta haña sosten di Postcode Loterij di Hulanda.

 

Would you like to contribute to BioNews
by sharing your news item?

Contact DCNA

Enjoying (Bio)News?

Stay up to date with our monthly digital newsletter which covers all the latest environmental news coming from the Dutch Caribbean.

Enter your email below to sign up!

Or follow us on Facebook