Vakatura nobo na Sekretariado di DCNA

All DC islands

Oumentá Kapasidat di Krea Fondo pa Konservashon di Biodiversidat na Hulanda Karibense

E último aña akí a presentá diferente reto pa Organisashonnan di Maneho di Áreanan Protehá na Hulanda Karibense. E parkenan akí no solamente mester a wanta preshon kresiente di kambio di klima i deterioro di kondishonnan pa medioambiente, pero tambe e retonan ekonómiko di e pandemia di COVID-19. E parkenan ku tabatin severamente skarsedat di fondo, kasimente no a sobrebibí e krísis di COVID. Dutch Caribbean Nature Alliance (DCNA) ta en buska di un miembro nobo di personal pa drenta servisio, a base di fondonan generoso di Vogelbescherming Nederland, kende por bai enfoká riba oumentá e kapasidat di krea fondo pa konservashon di biodiversidat na Hulanda Karibense. Protekshon di áreanan natural ta krusial pa e desaroyo ekonómiko duradero di e islanan pa rekuperá di e pandemia i pa resistí e impaktonan di kambio di klima.

E Organisashonnan di Maneho di Áreanan Protehá tin un papel importante den diseñá, implementá i manehá esfuersonan di konservashon di naturalesa. Pa motibu di COVID-19, tur Organisashon di Maneho di Áreanan Protehá na Hulanda Karibense a haña nan ku un bahada signifikante den nan entrada pa motibu ku e kontribushon di usuarionan a disparsé, pero tambe pa e echo ku no tabatin konsiderashon di parti di gobièrnunan lokal, nashonal i di reino pa duna fondo struktural pa ehekushon di nan trabou di sumo importansia. Resultado di esaki tabata e posibilidat real di e Organisashonnan di Maneho di Áreanan Protehá di baha man òf para nan aktividatnan.

Protekshon di e áreanan natural i e ekosistemanan i e habitatnan importante ku ta relashoná ku esakinan ta krusial pa e desaroyo duradero di e islanan, espesialmente ora konsiderá e impakto severo ku e pandemia tabatin riba komunidatnan ku ta den e riesgo di mas haltu di impakto di kambio di klima denter di e Reino Hulandes.

DCNA su ret di kontakto, ta suministrá sosten na e Organisashonnan di Maneho di Área Protehá riba tur seis isla di Hulanda Karibense: Aruba National Parks Foundation, STINAPA Bonaire, CARMABI Curaçao, STENAPA St. Eustatius, Saba Conservation Foundation i Sint Maarten Nature Foundation. Tin organisashon, inkluso DCNA mes, ku a logra duna fondo di emergensia pa medio di DCNA su Conservation Trust Fund na e parkenan pa sobrebibí e pandemia di COVID-19. Pero esaki ta solamente sufisiente pa duna sosten operashonal pa término kòrtiku. DCNA a krea tambe un Komité di Krea Fondo pa yuda sera buraku finansiero. Sinembargo, tin mester di un miembro di personal ku dedikashon pa ehekutá i kordiná aktividat ku e Komité di Krea Fondo ta indiká. E parkenan ta rekirí fondo pa tempu largu, konsistente pa sigurá ku nan por planifiká i realisá strategianan importante pa temporada largu.

Afortunadamente, Vogelbescherming Nederland den forma generoso a bai di akuerdo pa duna fondo pa un puesto na Sekretariado di DCNA pa bai enfoká riba kreashon di kapasidat di fondo pa biodiversidat denter di Hulanda Karibense. E empleado akí lo haña empleo den e Sekretariado di DCNA komo e Empleado Séniòr pa Krea Fondo i lo ta responsabel pa desaroyo di solushon duradero di fondo pa e parkenan akí. E miembro nobo di personal ta haña e oportunidat úniko di desaroyá i implementá un ret di sosten, integrando huntu stakeholdernan, donantenan i desaroyadónan.

Por spera ku anunsio di e vakatura pronto lo ta publiká. Tur persona interesá pa solisitá mester sigui informashon riba medionan sosial di DCNA (Facebook, Instagram) i e wepsait (https://dcnanature.org/news/) pa mas informashon tokante e vakatura ora esaki ta disponibel.

Direktor di Vogelbescherming Nederland, Fred Wouters (na man robes) i presidente di DCNA Hellen van der Wal (na man drechi) poniendo firma bou di e kontrakt pa un puesto di personal na e Sekretariado di DCNA ku e tarea di enfoká riba e kapasidat di krea fondo pa konservashon di biodiversidat pa Hulanda Karibense.

 

 

Would you like to contribute to BioNews
by sharing your news item?

Contact DCNA

Enjoying (Bio)News?

Stay up to date with our monthly digital newsletter which covers all the latest environmental news coming from the Dutch Caribbean.

Enter your email below to sign up!

Or follow us on Facebook