Caribbean Shark Coalition lo ta anfitrion di e promé tayer regional pa mehorá siensia tokante i di konservashon di tribon i chuchu den region di Karibe Amplio

All DC islands

Caribbean Shark Coalition (CSC) ta anfitrion di e promé tayer regional na St. Maarten di 12 pa 16 di sèptèmber 2022.  Meta di e tayer ta duna training riba tereno i sostené e metanan di tempu largu pa krea kapasidat pa sensia tokante tribon i chuchu i nan konservashon den e region di Karibe Amplio. Mas ku 20 partisipante konsistiendo di sientífiko, sambuyadó, protektor di naturalesa, empleado di gobièrnu, studiante i manager di parke lo asistí, representando 12 diferente pais rònt Karibe.

Tokante Caribbean Shark Coalition

Foto: Sami Kattan

A lanta Caribbean Shark Coalition (CSC) dor di Dutch Caribbean Nature Alliance (DCNA) ku Beneath the Waves (BTW) na 2020 komo kontesta riba petishonnan internashonal pa hasi esfuerso intensivo pa yega na akshon di konservashon den kolaborashon, di tribon i chuchu den e region di Karibe Amplio. E miembronan di CSC ta representá un kolekshon di eksperto for di NGOnan, komunidatnan lokal, organisashonnan intergubernamental i gobièrnunan, akademianan i institutonan di maneho ku ta traha huntu ku otro pa duna mas avanse den estudio i konservashon di tribon i chuchu den Karibe.

Enfoke di e Tayer

Pa medio di e tayer, CSC enfoká riba lanta konsiensia tokante e presensia i importansia di tribon i chuchu denter di Karibe. Lo siña e miembronan di Caribbean Shark Coalition diferente método básiko di kolektá informashon pa prepará, komprendé i informá otronan tokante e efektividat di nan áreanan di parke marino kaminda ta protehá tribon i chuchu. Un otro meta importante di e tayer ta pa generá dato sientífiko pa sostené esfuersonan di promoshon pa yega na mehorá maneho di tribon a traves di e koredornan migratorio di diferente espesie di tribon. CSC ta stimulá koperashon internashonal i e aktividat di kompartí dato ku ta esensial pa protekshon efektivo di e espesienan ku ta krusa frontera.

Foto: Sami Kattan, Beneath the Waves

E partisipantenan ta haña training riba tereno pa siña kon pa traha i instalá trampa pa marka tribon (asina yamá ‘drum lines’), siña tokante ekipo nesesario pa kohe tribon di manera safe, kon pa anda ku animal i laga nan bai den libertat, kolekshon di dato, traha muestra, i prosesonan di maneho, banda di training di uso di un stashon di bou di awa ekipá ku video i ekipá ku as ku por manehá na distansia.  Ademas, e partisipantenan lo siña tokante e benefisio di metodologianan adishonal manera traha muestra di sedimento segun su kapa di edat (‘sediment coring’), uso di aparato pa kapta señal akústiko i análisis di DNA di medioambiente pa por traha un banko di dato mas sólido tokante habitat i biodiversidat. E training riba tereno lo ta bou di guia di Dr. Oliver Shipley (BTW) i Tadzio Bervoets (DCNA).

E importansia pa e otro islanan di Karibe

E tayer akí ta un ehersisio den kolaborashon, kreando e relashonnan nesesario pa duna sosten, guia, konseho i rekurso, tantu virtual komo en persona, pa futuro investigashon. Na final di e tayer, CSC tin komo meta pa tur partisipante regresá nan nashon kas ku eksperensia práktiko i training pa investigashon di konservashon di tribon i e hèrmèntnan i e manual nesesario pa traha nan mes proyekto di investigashon.

“Tribon ku chuchu tin un papel esensial den mantené e balansa i biodiversidat denter di e ekosistemanan marino lokal i regional,” Dr. Oliver Shipley, kende ta Séniòr Sientífiko di Investigashon na BTW, ta kompartí. “Nan protekshon ta importante pa tin un futuro fuerte i saludabel den e region di Karibe Amplio.”

Tadzio Bervoets, Direktor di DCNA ta agregá “ku e tayer regional akí, nos ta spera di krea e kolaborashon nesesario pa identifiká nesesidat i proveé rekurso pa tur stakeholder pa nan bai traha huntu, no solamente pa konservashon di tribon i chuchu, pero pa Karibe Amplio komo totalidat.”

E tayer ta realisá den un kordinashon di DCNA i BTW i a bira posibel grásias na fondo di parti di Blue Marine Foundation, World Wide Fund for Nature (WWF-NL) i sosten operashonal di GoPro for a Cause.

Would you like to contribute to BioNews
by sharing your news item?

Contact DCNA

Enjoying (Bio)News?

Stay up to date with our monthly digital newsletter which covers all the latest environmental news coming from the Dutch Caribbean.

Enter your email below to sign up!

Or follow us on Facebook