DCNA ta fasilitá plataforma pa investigashon di áreanan marino protehá den Karibe

All DC islands

Willemstad – E konvenshon di Dutch Caribbean Nature Alliance (DCNA) a kuminsá ku un workshop tokante resistensia pa kambio di klima. El a sirbi komo plataforma pa e investigadónan di Koninklijk Instituut voor Taal-, Land en Volkenkunde (KILTV) i ekspertonan den Karibe Ulandes kompartí konosementu ku otro. E partisipantenan a diskutí e impakto di kambio di klima riba ekosistemanan marino den Karibe Ulandes i otro asuntunan relatá na esaki.

Diferente perspektiva

E workshop aki ta parti di un proyekto piloto ku ta trata na analisá i komprondé e impakto di kambio di klima riba áreanan marino protehá na Indonesia i den Karibe. Pa por yega na un nivel di komprondementu mas eksakto posibel, ta importante pa risibí informashon sientífiko i práktiko. Yvonne Kunz, e prinsipal investigadó doktorá di KITLV, ta splika dikon: “Kompartí konosementu ta un aspekto klave den e proyekto piloto aki. Si nos ke komprondé e impakto di kambio di klima riba áreanan marino protehá, nos mester papia ku esnan ku berdaderamente ta eksperensiá e impakto aki. Esaki ta nos motivashon prinsipal pa optené informashon for di mas tantu fuente posibel.”

Workshop tokante resistensia kontra kambio di klima

 

Kolaborashon ku DCNA

David Kloos, lider di e proyekto aki na KITLV, ta sigui amplia bisando ku “DCNA a keda enbolbí den e proyekto aki for di un inisio. Nan ta un grupo di interes importante den Karibe.” E investigashon ta un análisis komparativo i ta importante pa por kompará riba diferente aspekto. Kloos ta sigui splika: “Maneho versus práktika ta un aspekto di komparashon importante, pero tambe e kantidat di añanan ku e áreanan marino protehá ta eksistí. Nos a skohe pa investigá áreanan protehá na Boneiru i Aruba, kaminda tin un diferensia di aña di eksistensia.” Komparando Karibe i Indonesia, KITLV por analisá un otro tipo di diferensia tambe. E yamada pa protehá sierto áreanan den Karibe ta mas ‘bottom-up’, miéntras ku na Indonesia e inisiativa ta bini mas di parti di gobièrnu. Ademas, e kontrastenan aki ta fasilitá análisis i komparashon di diferente punto di salida pa loke ta trata konservashon di ekosistemanan marino”.

Impakto di kambio klimatológiko

Algun hende ta konsiderá kambio di klima algu teóriko, apesar ku e region di Karibe a kuminsá sinti su efektonan kaba.

Melanie Meijer zu Schlochtern di DCNA ta amplia: “Nos a opservá un deterioro di nos refnan di koral. Esaki mayoria siudadano lo no ta konsiente di dje, pero si nos refnan sigui deteriorá sin ku nos intervení, e awanan blou i kristalino ku nos konosé awe por bira bèrdè. Si nos kòrda riba e balor ekonómiko di nos refnan di koral, nos lo komprondé ku deterioro di nos refnan di koral tin un impakto direkto riba turismo, un di e pilánan mas importante di nos ekonomia.”

Tur hende por i mester kontribuí na mitigá e impakto di kambio klimatológiko.

E proyekto piloto aki ta keda ehekutá den estrecho kolaborashon ku Nederlands Instituut voor Ecologie (NIOO), Netherlands Institute for Advanced Studies (NIAS) i vários partner na Indonesia i den Karibe. Pa mas informashon tokante e proyekto piloto aki i tepnan práktiko por bishitá página di Facebook di DCNA: DutchCaribbeanNatureAlliance.

Would you like to contribute to BioNews
by sharing your news item?

Contact DCNA

Enjoying (Bio)News?

Stay up to date with our monthly digital newsletter which covers all the latest environmental news coming from the Dutch Caribbean.

Enter your email below to sign up!

Or follow us on Facebook