Wardadó silensioso di ref: e lucha pa salba tribon ’i pieda karibense

All DC islands

Otro luna durante e Conference of Parties for the Cartagena Convention  – COPs (Konferensia di Partidonan pa e Tratado di Cartagena) na Aruba, Reino Hulandes lo pidi pa mas protekshon pa e tribon ’i pieda karibense. Tribon ’i pieda karibense ta hunga un ròl esensial ora ta trata di konservashon di un ekosistema di ref salú i desaroyo di resiliensia den oséano. E protekshon adishonal akí ta di importansia fundamental pa garantisá un futuro sostenibel pa e espesie ikóniko akí. 

Laman Karibe ta konosí pa su awa kristalino, ref di koral vibrante i un deslumbrante variedat di bida marino. Entre e habitantenan karismátiko di e paradiso bou di laman akí tin e tribon ‘i pieda karibense (Carcharhinus perezii), un espesie ku ta hunga un ròl krusial ora ta trata di konservashon di salú di e ekosistemanan di ref di koral. Den área karibense e bestia yagdó tòp akí ta konfrontá menasanan ku ta oumentando, pero tin speransa na horizonte. Durante e Conference of Parties for the Cartagena Convention (COPs) binidero, Reino Hulandes lo boga pa yega na mas protekshon pa e bunita kriaturanan akí pa medio di inkluí nan den anekso III di e protokòl di SPAW. Anekso III ta enserá espesienan di mata i bestia ku tin mester di protekshon èkstra pa garantisá ku e espesienan akí tin e kapasidat pa rekuperá nan populashon adekuadamente den region karibense mas amplio. 

Tribon ’i pieda karibense. Potret: Jim Abernethy- all rights reserved

Importansia 

Tribon ‘i pieda karibense ta prosperá bon den e laman kayente i tropikal di region karibense, i e área kaminda ta topa kuné ta kore for di Florida te Brasil. E espesie akí ta un di e espesienan di tribon ‘i pieda ku nan ta enkontrá mas tantu den henter Laman Karibe. E tribon akí ku por bira te 3 meter largu, ta un di e bestianan yagdó tòp mas grandi den e ekosistema di ref i e ta para na e puesto mas haltu den e ret di alimento marino, ku solamente un par di enemigu natural.  

Banda di ta di balor ekonómiko grandi, pa motibu ku sambuyamentu ku tribon ta un atrakshon prinsipal pa sambuyadónan di henter mundu, e espesie akí ta di importansia fundamental pa konservashon di e ekilibrio dentro di e ekosistema di ref. Nan presensia ta yuda ku regulashon di e populashon di espesienan di presa mas chikitu, loke na su turno ta prevení komementu eksesivo riba kama di yerba di laman i ref di koral, i ta eleminá piská ku a bira malu i suak for di den e populashon. E ekilibrio akí ta esensial pa konservashon di salú i diversidat di henter e ref di koral. 

Menasa 

No opstante nan importansia ekológiko i ekonómiko, e tribon ‘i pieda karibense den área karibense ta konfrontá hopi menasa ku a kondusí na un redukshon di populashon di segun balotashon entre 50 i 79% den e último 29 aña. Den área (hulandes) karibense kousa di esaki ta prinsipalmente:  

Degradashon di nan ambiente natural: Degradashon di ref di koral i kama di yerba di laman komo konsekuensia di kambio di klima, kontaminashon i desaroyo na kosta, tin un impakto direkto riba disponibilidat di presa pa e tribonnan akí. Pèrdida di área di biba ta redusí nan abilidat pa haña kuminda i refugio. 

Sobrepeska: Sobrepeska ta forma un di e menasanan di mas direkto pa tribon ‘i ref karibense. Hopi biaha ta kue nan insidentalmente den piskamentu komersial, kaminda e piskadónan ta enfoká riba otro tipo di espesie, òf intenshonalmente kaminda ta yag riba nan pa motibu di nan hala, ku hende ta usa den sòpi di hala di tribon. 

Tribon ‘i pieda karibense. Potret: Elianne Dipp

Un yamada pa mas protekshon 

Tin diferente organisashon i persona individual ku ta dediká nan mes na protekshon di tribon i su áreanan di biba den Karibe Hulandes. Un logro importante tabata lantamentu di áreanan protehá manera e Yarari Marine Mammal and Shark Sanctuary (Santuario di Tribon i Mamífero di Laman Yarari) entre Boneiru, Saba i Sint Eustatius. Un otro logro tabata na aña 2019 na momentu ku gobièrnu hulandes a adoptá un Strategia Internashonal pa Tribon. Den e strategia nan ta stipulá kua ta e medidanan i protekshon i maneho ku gobièrnu mester tuma pa tribon i chuchu den tur laman i oséano kaminda Hulanda tin influensia (inkluso área karibense). Te ainda esfuerso adishonal ta nesesario pa krea mas área marino protehá, mehorá mantenshon di lei, redusí kontaminashon di oséano i promové práktikanan sostenibel di piskamentu. E espesienan akí no konosé frontera (polítiko) i nan protekshon ta eksigí esfuerso di protekshon di naturalesa riba eskala grandi den área hulandes karibense i pafó di esaki. 

Konklushon 

E tribon ‘i pieda karibense ta un espesie ku ta di importansia grandi pa ref di koral den área (hulandes) karibense. Awor ku ta bai pidi protekshon èkstra durante e enkuentro di COPS na Aruba, tin un speransa ku e espesie akí lo tin un futuro salú. Pa medio di rekonosé nan importansia ekológiko i e retonan ku nan ta konfrontá, nos por traha huntu pa garantisá un mihó futuro pa e tribon ‘i pieda karibense den área hulandes karibense i pafó di esaki.          

DCNA 

Dutch Caribbean Nature Alliance (DCNA) ta sostené komunikashon (sientífiko) i ‘outreach’ den region hulandes karibense pa medio di hasi informashon sientífiko relashoná ku naturalesa mas ampliamente disponibel via entre otro Dutch Caribbean Biodiversity Database, DCNA su plataforma di notisia BioNews i via prensa. E artíkulo akí ta forma parti di e resultadonan di diferente investigashon sientífiko, pero e investigashonnan mes no ta investigashon di DCNA. No por derivá ningun derecho for di e kontenido. DCNA no ta responsabel pa e kontenido i e konsekuensianan (in)direkto ku ta surgi for di publikashon di e artíkulo akí. 

Would you like to contribute to BioNews
by sharing your news item?

Contact DCNA

Enjoying (Bio)News?

Stay up to date with our monthly digital newsletter which covers all the latest environmental news coming from the Dutch Caribbean.

Enter your email below to sign up!

Or follow us on Facebook