Dutch Caribbean Nature Alliance ta trata tres tópiko krítiko durante e konvenshon na kaminda

All DC islands

Kralendijk – E siguiente konvenshon di Dutch Caribbean Nature Alliance (DKNA) lo enfoká riba maneho, kambio di klima i envolvimentu di hubentut den konservashon di naturalesa. Tur seis organisashon pa maneho di parke nashonal di e islanan ku ta forma parti di Reino Hulandes den Karibe ta uniendo forsa pa fortifiká polítikanan pa maneho stratégiko di naturalesa pa e añanan ku ta bini. Patrono di DKNA, Su Altesa Real Prinsesa Beatrix di Hulanda, tambe lo asistí na e konvenshon ku lo tuma lugá di djamars 23 pa djabièrnè 27 di novèmber na Kòrsou.

Prinsesa Beatrix ta topa direktor di DCNA, Tadzio Bervoets, na Saba. Fotógrafo: Lincoln Charles

Maneho den tempo di rekuperashon

E trastornonan signifikativo ku e pandemia a kousa a kòrda nos ku nos ekosistemanan ta krítiko pa nos alkansá éksito, siendo islanan chikitu den desaroyo. Futuro desaroyo den e temponan difísil aki mester ta duradero, ku e meta pa konservá e biodiversidat di nos islanan, ku na su turno ta sostené e produkto turístiko úniko di e islanan di Reino Hulandes den Karibe.

Un di e aktividatnan ku ta destaka durante e konvenshon ta e reunion di direktiva, ku pa promé biaha lo tuma lugá en persona, despues di kasi dos aña di reunion virtual. Tadzio Bervoets, direktor di DKNA a indiká ku “ounke nos ta konvensí ku nos por alkansá mas dor di uni forsa, nos ta realisá ku maneho ta mesun importante. Esaki ta e motibu dikon nos reunion di direktiva lo atendé ku nos struktura di maneho i nos vishon stratégiko pa e temporada benidero.”

 

Kambio klimatológiko

E seis islanan di Reino Hulandes den Karibe ta saliendo di e efektonan di e pandemia. Sinembargo, e region di Karibe mes tambe ta eksperensiando un otro krísis ku lo tin impakto signifikativo riba e ekosistemanan ku ta asina krítiko pa e ekonomianan duradero ku e islanan mester konstruí. Un di e workshopnan na e konvenshon lo enfoká riba resistensia pa kambio di klima. E tópiko aki no por tabata mas oportuno, konsiderando lidernan global su kompromiso renobá pa mantene subida di e temperatura averahe global bou di 2° Celsius. Presidente di direktiva di DCNA, Hellen van der Wall, a indiká ku “Karibe tin un posishon geográfiko prominente den e krísisnan klimatológiko i solamente uzando e produkto- i servisionan ku naturalesa ta brinda nos, nos islanan di Reino Hulandes den Karibe por bira sosiedatnan resistente.” E workshop aki lo tira lus riba un proyekto piloto ku ta trata na analisá i komprondé e impakto di kambio di klima riba áreanan marino protehá na Indonesia i den Karibe. E meta di término largu di e proyekto aki ta pa organisá un programa di investigashon muchu mas elaborá ku lo yuda desaroyá intervenshonnan kontra e konsekuensianan dinámiko di kambio klimatológiko.

Envolvimentu di hubentut

Durabilidat ta enserá kumpli ku nesesidatnan aktual, sin komprometé e siguiente generashon pa por kumpli ku esnan di dje. Ku e konosementu aki DCNA ta konsiderá hóbennan un grupo di interes krusial den nan trabou. For di 2019 e konvenshonnan di DCNA ta inkluí un simposio pa hóben, ku ta brinda nan un plataforma pa komparti nan punto di bista. Nan aporte a mustra di ta balioso durante añanan. Danki na nan aporte a krea programanan di naturalesa pa hubentut. E aña aki tambe lo figurá durante e simposio kombersashonnan dirigí riba e importansia pa invertí den enseñansa tokante naturalesa, pa asina yuda krea hóbennan ku ta sinti nan mes responsabel pa áreanan natural. A pesar ku e generashon di embahadónan di medioambiente ku ta na kaminda ta parse di ta inkliná pa praktiká uzo responsabel di rekursonan natural disponibel, ta imperativo pa ofresé nan e hèrmèntnan nesesario for di ora nan ta hóben.

Pa mas informashon tokante e konvenshon di DCNA por bishitá e página di Facebook di DCNA: DutchCaribbeanNatureAlliance.

Would you like to contribute to BioNews
by sharing your news item?

Contact DCNA

Enjoying (Bio)News?

Stay up to date with our monthly digital newsletter which covers all the latest environmental news coming from the Dutch Caribbean.

Enter your email below to sign up!

Or follow us on Facebook