Dutch Caribbean Nature Alliance ta brinda plataforma pa enbolbimentu di hóben den konservashon di naturalesa

All DC islands

Willemstad – Un grupo di hóben komprometí tabatin e oportunidat pa diskutí edukashon tokante naturalesa i enbolbimentu di hóben den konservashon di naturalesa durante e Simposio pa Hóben riba Edukashon tokante Naturalesa organisá pa Dutch Caribbean Nature Alliance (DCNA) komo parti di nankonvenshon anual.

Partisipashon di hóben

Un di e prioridatnan di DCNA i e organisashonnan ku ta miembro di dje ta pa enbolbí hóben den nan trabou di salbaguardia naturalesa na e islanan Karibense di Reino Ulandes. Despues di un programa di interkambio eksitoso pa hóben durante e konvenshon na aña 2019, e ekspektativanan pa e simposio di e aña aki tabata haltu. Presidente di direktiva di DCNA, señora Hellen van der Wal ta kere firmemente ku “e generashon mas yòn tin un futuro awe. Nan tin un bos i nos mester skucha nan mas tantu.” E simposio pa hóben ku resientemente a tuma lugá durante e konvenshon di DCNA tabata enfoká riba edukashon tokante naturalesa i e Agènda 2030. Un total di diesshete partisipante entre diessinku i bintitres aña tabatin e oportunidat pa diskutí riba nivel stratégiko kon nan lo ke mira konservashon di naturalesa desaroyá riba nan isla, kon nan lo ke mira nan gobièrnunan komprometé mas ku konservashon di naturalesa i kon nan ta mira nan bida i nan ta mira ku kambio di klima lo impaktá nan bida i nan medionan pa sobrebibí.

Prinsesa Beatrix huntu ku e partisipantenan di Young Ones United To Heighten Curaçao (YOUTH-C)

 

Preparashon ekstenso

Promé ku nan a diskutí e tópikonan di dia i prepará nan konklushonnan, e partisipantenan a pasa den un temporada di preparashon ku a dura tres luna. Nan a siña mas tokante medioambiente en general, e Metanan pa Desaroyo Duradero (“SDG”) i tambe nan a desaroyá nan abilidatnan pa debatí. E tópikonan spesífiko ku nan a prepará pa diskutí ta medioambiente en general, bida bou di awa, kambio di klima i edukashon tokante naturalesa.

Programa di e simposio

Señora Sietske van der Wal, representando Aruba National Parks Foundation, a yama e partisipantenan bon biní. E diskurso prinsipal tabata na enkargo di Dahlia Hassell-Knijff, responsabel pa proyekto na DCNA. Dahlia a kuminsá su karera den konservashon di naturalesa komo mucha di shete aña na Saba. Despues di su diskurso, señor Elton Villareal a guia un diskushon entre e hóbennan. Na final, nan tabatin oportunidat pa presentá nan konklushonnan na Su Altesa Real Prinsesa Beatrix di Ulanda, patrono di DCNA.

Na kaminda pa 2030

Den públiko a reina un interes notabel pa e diferente puntonan di bista ku e hóbennan a trese dilanti. Nan a presentá tres proposishon: un kampaña di konsientisashon, un inisiativa pa limpia Kòrsou semanalmente (“Cleaning Sundays”) i un konseho pa hubentut pa atendé asuntunan di medioambiente.

Sr. Tadzio Bervoets, direktor di DCNA, a sera e atardi bisando: “futuro di konservashon di naturalesa ta pinta sumamente briante.”

“Generalmente hóbennan tin un interes grandi pa siña. Despues di mira e diskushonnan di awe, nos ta mas motivá ainda pa prepará un programa inspirativo i edukativo otro aña pa nan.”, Achsah Mitchell di St. Eustatius National Parks ta komentá.

E siguiente enkuentro ofisial ku hóbennan lo tuma lugá den luna di mart na St. Eustatius.

Pa mas informashon tokante e Simposio pa Hóben por bishitá página di Facebook di DCNA: DutchCaribbeanNatureAlliance

Would you like to contribute to BioNews
by sharing your news item?

Contact DCNA

Enjoying (Bio)News?

Stay up to date with our monthly digital newsletter which covers all the latest environmental news coming from the Dutch Caribbean.

Enter your email below to sign up!

Or follow us on Facebook