Willemstad – Un grupo di hoben comprometi tabatin e oportunidad pa discuti educacion tocante naturalesa y envolvimentu di hoben den conservacion di naturalesa durante e Simposio pa Hoben riba Educacion tocante Naturalesa organisa pa Dutch Caribbean Nature Alliance (DCNA) como parti di nan convencion anual.

Participacion di hoben

Un di e prioridadnan di DCNA y e organisacionnan cu ta miembro di dje ta pa envolvi hoben den nan trabou di salvaguardia naturalesa na e islanan Caribense di Reino Hulandes. Despues di un programa di intercambio exitoso pa hoben durante e convencion na aña 2019, e expectativanan pa e simposio di e aña aki tabata halto. Presidente di directiva di DCNA, señora Hellen van der Wal ta kere firmemente cu “e generacion mas hoben tin un futuro awe. Nan tin un bos y nos mester scucha nan mas tanto.” E simposio pa hoben cu recientemente a tuma luga durante e convencion di DCNA tabata enfoca riba educacion tocante naturalesa y e Agenda 2030. Un total di diesshete participante entre diescinco y bintitres aña tabatin e oportunidad pa discuti riba nivel strategico con nan lo ke mira conservacion di naturalesa desaroya riba nan isla, con nan lo ke mira nan gobiernonan compromete mas cu conservacion di naturalesa y con nan ta mira nan bida y nan ta mira cu cambio di clima lo impacta nan bida y nan medionan pa sobrebibi.

Prinsesa Beatrix huntu ku e participantenan di Young Ones United To Heighten Curaçao (YOUTH-C)

Preparacion extenso

Prome cu nan a discuti e topiconan di dia y prepara nan conclucionnan, e participantenan a pasa den un temporada di preparacion cu a dura tres luna. Nan a siña mas tocante medioambiente en general, e Metanan pa Desaroyo Duradero (“SDG”) y tambe nan a desaroya nan abilidadnan pa debati. E topiconan specifico cu nan a prepara pa discuti ta medioambiente en general, bida bou di awa, cambio di clima y educacion tocante naturalesa.

Programa di e simposio

Señora Sietske van der Wal, representando Aruba National Parks Foundation, a yama e participantenan bon bini. E discurso principal tabata na encargo di Dahlia Hassell-Knijff, responsabel pa proyecto na DCNA. Dahlia a cuminsa su carera den conservacion di naturalesa como mucha di shete aña na Saba. Despues di su discurso, señor Elton Villareal a guia un discusion entre e hobennan. Na final, nan tabatin oportunidad pa presenta nan conclusionnan na Su Altesa Real Prinsesa Beatrix di Hulanda, patrona di DCNA.

Na caminda pa 2030

Den publico a reina un interes notabel pa e diferente puntonan di bista cu e hobennan a trese dilanti. Nan a presenta tres proposicion: un campaña di consientisacion, un inisiativa pa limpia Corsou semanalmente (“Cleaning Sundays”) y un conseho pa hubentut pa atende asuntunan di medioambiente.

Sr. Tadzio Bervoets, director di DCNA, a sera e atardi bisando: “futuro di conservacion di naturalesa ta pinta sumamente briante.”

“Generalmente hobennan tin un interes grandi pa siña. Despues di mira e discusionnan di awe, nos ta mas motiva ainda pa prepara un programa inspirativo y educativo otro aña pa nan.”, Achsah Mitchell di St. Eustatius National Parks ta comenta.

E siguiente encuentro oficial cu hobennan lo tuma luga den luna di mart na St. Eustatius.

Pa mas informacion tocante e Simposio pa Hoben por bishita pagina di Facebooc di DCNA: DutchCaribbeanNatureAlliance