DCNA su Promé Big Live Nature Quiz Eksitoso: Siñamentu Online pasando Prèt ku ta trese mucha den kontakto ku otro rònt Hulanda Karibense

All DC islands

Dutch Caribbean Nature Alliance (DCNA) su promé Big Live Nature Quiz resientemente a marka e start di un manera plasentero, nobo i kreativo pa embolbí i gara atenshon di hóbennan pa medio di siñamentu via internèt tokante naturalesa den Hulanda Karibense.  Siman pasá, 24 tim di 1-4 hóben di 11-14 aña di edat di Aruba, Boneiru, Kòrsou, Saba, Sint Maarten i Statia a kompetí ku otro den un live kues online. Despues di hopi tanda di pregunta tokante naturalesa, den un kues kandente ku suspenso un tim na Saba a gana. E di dos lugá a bai pa Sint Maarten i di tres lugá pa Boneiru.

 Dutch Caribbean Nature Alliance (DCNA), un ret di kontakto regional di áreanan protehá, ku a lanta pa asistí e Organisashonnan pa Maneho di Áreanan protehá na e seis islanan, ta sostené entre otro programanan di edukashon di naturalesa.  DCNA su Evento anual di Interkambio di Junior Ranger, pa trese hóbennan di e seis islanan di Hulanda Karibense huntu riba un isla pa siña di naturalesa di otro, desafortunadamente a keda kanselá e aña akí pa motibu di e krísis di corona. Sinembargo, pa kontrarestá e sirkunstansianan di e aña akí ku positivismo, a krea e Big Live Nature Quiz pa por hisa e sosten na e empleadonan di edukashon di naturalesa i tambe pa tene e hóbennan den un situashon safe na nan respektivo islanan.

E kues live i interaktivo tabatin preguntanan tokante tópikonan manera Flora i Founa, Ekosistema, Adaptashon na Klima i Durabilidat i preguntanan tokante e Parke Nashonalnan di Hulanda Karibense ku ta manehá pa STINAPA na Boneiru, CARMABI na Kòrsou, Fundacion Parke Nacional Aruba, Saba Conservation Foundation (SCF), STENAPA na Statia i Nature Foundation Sint Maarten (NFSXM).

Nos ta hopi orguyoso di e muchanan ku a partisipá. Tabata tremendo pa mira e hóbennan entusiasmá di rònt di Hulanda Karibense, pero mas importante ainda esaki tabata un gran oportunidat di siñamentu, pa por a siña di e otro islanan i nan naturalesa. Nos ta ansioso pa hasi e evento akí di nobo den futuro!” Tineke van Bussel & Dahlia Hassell, kendenan tabata e organisadónan di DCNA su Big Live Nature Quiz a deklará

Na Boneiru hóbennan di Jong Bonaire i Junior Rangernan di Stinapa a bini huntu na Jong Bonaire. SCF i Saba Nature Education a organisá huntu un evento na Long Haul. Na Sint Maarten NFSXM tambe a trese nan Junior Rangernan huntu. Na Statia STENAPA tabatin hóbennan di Golden Rock Roman Catholic School i Bethel Methodist School huntu. Fuera di e gruponan akí, tabatin tambe hóbennan ku a partisipá for di nan kas. Nos ta hopi agradesido na tur embolbí ku a duna e hóbennan oportunidat pa partisipá.

Photo credit: © Judy Morgan

Un Kaluroso Pabien ta bai pa e Timnan Ganadó! E tim ganadó di Saba pronto lo bai hasi un paseo di snòrkel i sambuyá i e otronan lo risibí un T-shirt ku e logo.  DCNA tin komo meta pa bai hasi esaki un evento di kada aña, ku e probabilidat ku e ta bira un aktividat pa adulto tambe. Pues si bo a pèrdè e oportunidat akí, tene e kanalnan di medionan sosial di DCNA na bista i nos ta kontentu di mira bo e siguiente biaha!

Would you like to contribute to BioNews
by sharing your news item?

Contact DCNA

Enjoying (Bio)News?

Stay up to date with our monthly digital newsletter which covers all the latest environmental news coming from the Dutch Caribbean.

Enter your email below to sign up!

Or follow us on Facebook